Võro keele nätäl paksõ võrokõisilõ hulga võimaluisi umma kiilt kuulda ja kõnõlda

Egä aasta märdikuu edimädsel täüspikäl nädälil peetäs võro keele nädälit. Seo aastak oll joba 16. kõrd. „Hää om nätä, et võro keelega köüdetüide tegemiisi nimekiri om aigupiten mugu pikembäs lännü ja ka ütenlüüjit tulõ mano,“ tõi vällä Võro Instituudi direktri Kuuba Rainer.

Minevaastak saiva vungi sisse mõnõ võro keelega köüdedü tegemise, miä lätsi edesi ka timahavva. Nädäli joosul teivä tüüd pia 200 võro keele agenti, kiä olli ja omma edespitengi iinkujos tõisilõ võro keele egäpäävätsen pruukmisõn. Tegüsämäbä agendi panni üles võrokeelitsit silte, kõrraldi sõpruga veebi kaudu kokkosaamiisi, tüü man peeti võro keelen kuunolõkiid ja kokkosaamiisi. Seoaastanõ agente sõnnom oll „Kiildke vai är – ma iks kõnõlõ!“, mink valisi vällä Moloraamadu võro keele rühmä inemise. Näüdüsagendis ja reklaaminäos oll tunnõt muusik ja kiränik, mitmit eesti- ja võrokeelitsit laulõ kirotanu Ilvesse Aapo. Tä tull hää meelega vabahusõ- ja protestivaimulidsõ sõnomiga üten ja ütles: „Ma olõ Ilvesse Aapo ja tii, mis taha. Näütüses kõnõlõ võro kiilt, ku taha, ja tii laulõ, ku taha.“

6. märdikuu pääväl astsõ kuus aos ammõtihe võro keele iistkõnõlõja, kink ülesandõs om umal ammõdiaol pruuki võro kiilt inämb ku muido ja olla iinkujos avaligun võro keele pruukmisõn. Iistkõnõlõja valitas võrokõisi vai võro kiilt mõistvidõ avaligu elo tegeläisi siäst. Edimädses võro keele iistkõnõlõjas om Anneli Ott. Joba joulukuun saa iistkõnõlõjas kiäki tõnõ. Iistkõnõlõjidõ tegemiisi saa kaia Moloraamadu lehe „Võro keele iistkõnõlõja“ päält.

6. märdikuu pääväl Põlva Kultuurikeskusõn peet kontsõrdil „Liigu, liigu, laulukõnõ!“ kuulda vahtsidõ võrokeelitside koorilaulõ edimäst ettekandmist. Üles astsõ kolm kuuri (Ritsik, Hilaro ja Tempera), kiä lauli ette osa avvuhinna saanuist laulõst. Koorilaulukonkursi pääpreemiä sai Ritsingu Alo professionaalsõ koorikultuuri ja Vana-Võromaa rahvalaulu kokkopandmisõ iist. Koorilaulukonkursist saa pikembält lukõ umapido.ee/uudisso/ ja mõnt avvuhinna saanu laulu saa takastperrä kaija TAST.

5. märdikuu mänge Võro Keskliina kooli noorõ Kandlõ kultuurimajan kooliteemalist muusikali „Koolin om umbõlõ mõnna“. Teksti kirot Contra ja muusiga Piret Rips-Laul.

Joba inne võro keele nädälit naas mäng „Võrokõsõ välläkutsõ“, miä härgüdi nii alostajit ku mõistjit täütmä lihtsit ja lõbosit ülesandit, miä kutsi võro kiilt pruukma. Kõik aig mängo ütentegijit tull saa ümbre, a pallo inemise teivä üten lihtsähe mõnõ ülesandõ. Sotsiaalmeediän teküt kõgõ inämb helevüst ülesannõ, miä kutsõ üles kirotama uma poodinimekirä võro keelen. Populaarnõ oll ka internetist võrokeelitside laulõ otsmisõ ja ütenlaulmisõ ülesannõ. Mängu avvuhinnasaaja kuulutõdas vällä 18. märdikuu Uman Lehen.

Moloraamadu grupin „Võro kiil“, kon om üle 11 000 liikmõ, käve võro keele nädälil elläv võrokeelitside postituisi tegemine ja kommõntiirmine. Tuu jakkus terve aasta joosul. Egä päiv panti üles võrokeelitsit luulõtuisi vai nalju. Võro Seldsi VKKF vällä annõdu videoklipi, miä avitasõ ümbre tougada võro keelega köüdetüid võlssuskmiisi, lätsi suurõ huuga lakja.

Nuu, kiä tahtsõva tõisilõ teedä anda umast soovist, et näidega võro kiilt kõnõldasi, sai tuud tetä rõnnamärgi vai Molovihu profiilipildi raamiga „Kõnõlõ mukka võro kiilt!“. Märgi sõnnom passis kõigilõ, nii võro keele egäpäävätsile pruukjilõ ku noilõ, kiä võro kiilt esi viil häste ei mõista.

Mitmit ettevõtmiisi oll võro keele nädäli aigu kavan kõigin Vana-Võromaa latsiaidu keelepesärühmin ja kuulõn. Kullõldi juttõ Helüaidast, mängiti vannu laulumängõ, tetti veebiviktoriini ülesandit ja Vana-Võromaa süüke, matkati võrokeelidse juhiga, panti üles võrokeelitsit söögisedeliid, loeti võrokeelitsit unõjuttõ ja haarõti võro keele sisse noid rühmi, kon muido kuuld võro kiilt harva. Mitmõn koolin kõnõli külälise võro keelest keelest ja oll ka eräle ettevõtmiisi nädäli pidämises. Võro Instituudin loiva koolilatsõ ette katskeelist raamatut „Pintslihannasuvi. Pintselsabasuvi“.

Põnõvit tegemiisi võisõ löüdä Vana-Võromaa muusõumõst. Karilatsi Vabaõhumuusõumin sai mängi võrokeelist maastigumängu ja Mõnistõ Talorahvamuusõumin ossa võtta tegemistunnõst. Võromaa kultuurikuan sai ja saa edespitengi kaia võro keele välläpanõkit. Kreutzwaldi muusõumin loeti ette võrokeelist „Kalõvipoiga“.

KUMU kunstimuusõumin tetti õkva inne võro keele nädälit vallalõ välläpanõk „Talomuro ilmaruum. Lõuna-Eesti loojad“, midä tutvustas võrokeeline helügiid. Välläpanõk jääs vallalõ tulõvaasta mahlakuuni.

Valmis sai maailma edimäne võrokeeline pistüjalapull (stand-up-nalatükk) „Kogõmus mass!“, a tuu edimäne näütämine tougati koroonaviirusõ peräst edesi. Tükü om kirotanu Ruitlasõ Olavi, lavastanu Tagametsa Tarmo, mäng Määri Andres.

Võro keele nädäli tegemiisi, vahtsidõ välläandidõ ja ettevõtmiisi kotsilõ sai lukõ katõst võro keele nädäli lehest, miä olli erivälläandõs Lõuna-Eesti Postimehe ja Lõunalehe vaihõl. Nädälist kõnõli viil erälde ka uudissõ ja luu Uman Lehen, Lõunalehen ja Lõuna-Eesti Postimehen.

Võro kiilt sai kuulda mitmin populaarsin tele- ja raadiosaatin: ETV Aktuaalsõ Kaamõra ilmateedüssen ja Terevisioonin, Vikerraadion Andres Oja muusigasaatõn jm. Terevisiooni saatõjuhel olli sälän võrokeelitside kirjuga Üükaku pusa. Vana võrokeelidse saatõ olli eräle teemaria pääl vällä tuudu Jupiteri kanali pääl.

Kae takastperrä TAST, midä meedian nätä om.

Kõrraldaja tennäse süämest kõiki võro keele nädäli tegemiisile vunki mano andnu inemiisi!

Võru keele nätäl tulõ jälki – 7.–13. märdikuul 2022. Hoiami õks võrokõsõ vaimu virgõ ja lustilidsõ – nii püsüs ilm ja püsümi esi!

 

Teedüst saa mano:
Toomõ Triin,

võro keele nädäli üts vidäjist

tel 5120772, triin.toom@wi.ee

 

Jagamine