Rihhard Iher om sündünü 1. mahlakuul 1910 Osolan Kivi talon. Elo joosul pidi tä pikält Võromaalt kavvõdal olõma – tuuiist om timä luulõ piä tävvenisti võrokiilne.

Haridusõ sai Rihhard Iher Prassi algkoolin (1916-20) ja Võro poiglatsi gümnaasiumin, mille lõpõt 1928. Aastil 1935-37 opsõ Tallinna Pedagoogikumin kuulmeistre ammõtit. Inne Tallinna-kuuli tiinse 1932-35 koolirahha vangivahina Haapsalun ni Harkun.

1937-39 oll koolioppaja Vana-Antsla Peetri algkoolin, säält edesi 1944. aastaga radokuuni
Sõmmõrpalo algkoolin, kon tull juhata ka laulukuuri, näütemänguringi ja mandoliiniorkõstrit. Saksa okupatsiooni lõpu aigu oll Iher lühküt aigu Võrumaa Teataja päätoimõndaja. Vinne aol tull minnä Harjomaalõ Aruküllä. Sääl tekk Rihhard Iher edimält traktorijaama man puusepätüüd, 1949. aastagast oll Oktoobri Võidu kolhoosin põllumiis.

1967. aastagal jäi tä pääle infarkti kodo, 1969 tull viimäs sõsara mano Osolahe, kon elli ütesä aastakka. Inne surma elli viil paar aastakka Rannu vallan Tartumaal, kon 31. põimukuul 1980 kuuli. Matõt om Rihhard Iher Osola surnuaida.

Kirändüslik tegevüs:

Jo gümnaasiumipäivil tekk Rihhard suvõl Osola latsiga näütemänge, midä ka esi kirot. Tõsitsõmb kirätegevüs nakas eestikiilside romaanõga “Kaheksa kellalööki” (ilmu 6.09.-17.12.1943 Eesti Sõnan) ja “Tagasi ellu” (2.12.1943-29.02.1944 Võrumaa Teatajan), ilmu ka kiräkiilset luulõt. Võrokiilse luulõtusõ, minka Iher om ka kirändüsluun, kirot tä pääasaligult 1967-68 rassõ haigusõ aigu. Tuuaig käve ka trüküsõnan väiku vaiõlus murdõkeele kotsilõ. Üts puultkõnõlõjit – Ain Kaalep – toimõnd 1980 ka Iheri luulõkoko. Ilmumada jäänü kirätöiest, midä om hulga rohkõmb, and Rihhardi tütär kirändüskriitik Leili Iher vällä tõsõ kogo. Käsikirän om nii võro- ku eestikiilset luulõt ja muudki.

Luulõkogo:

Kassimärss. Luulõtuisi võro murdõn (1980)
Havva-kivi. Luulõtuisi 1967-68 (1998)

Rihhard Iheri kotsilõ:

Sirp ja Vasar 25.07.1980 (Silvia Nagelmaa)
Looming 1980/7 (Alo Lõhmus)
Keel ja Kirjandus 1980/8 (Oskar Kruus)
Noorus 1988/2 (Leili Iher)
Võrumaa Teataja 2.04.1991 (Evar Saar)
Viruskundra 1995/4 (Maria Sikk)
Viruskundra 1998/9 (Valdo Valper)

Rihhard Iheri luulõt:

IMÄLE

Es lövvä sõski leso päält
sa, imä, keskmäst poiga,
es riibu hiirepiimä päält
sa tedä siidihoiga!

Sul tedä kandõn tihtigi
jõud justku võeti jalost,
ku vaiva tulli hulgani
säält väikost, vaesõst talost

Sa tedä sõski truvvistõ
kõik säetü päävä kandsõt,
ja üsäst olõkotilõ
nii hellält hällü pandsõt. –

Tuust saandõ aastit tull ja läts
oh, aastit terve rida!
Sai mehes tuugi hällülats
ja mehes hinnäst pidä …

Nüüd tiiä maki, mis um vaiv
ja tuudki, mis um valu,
kah tuud, kuis rappus elolaiv,
ku tsuskas tedä halu

Nüüd umbõs tiiä todagi,
mis sullõ võlgu olõ,
ja toda, imä, todagiq,
et masjat miust ei olõ.