Nele Hollo om sündünü 31. lehekuul 1978 Põlvan kunstnigu ja oppaja peren. 1980. aastagal kolisi perega Võro liina. Peris liinalats tää joht olõ-i – varatsõmb latsõpõlv läts müüdä Misson imä vanõmbide puul. Ildambagi om Nele Hollo egäl võimalusõl umma latsõpõlvõkodo külästänü.

Pääle null-klassi Võro 3. põhikoolin opsõ Nele Hollo 1985-1996 Võro 1. keskkoolin inglüse keele klassin. Kooliaigu võtsõ tä ossa ka kunsti- ja balletiringi tüüst. 1996. aastagast opsõ Tarto Ülikoolin norra kiilt ni kirändüst, 1997. aastagast Avatun Ülikoolin flamenkokultuuri.

Nele Hollo om tüütanü sekretärinä, norra, taani ja inglüse keele tõlkjana, oppajana. Tüüd om tä saanu ka Võro Kodoluumuusõumin ja Võro Instituudin. Tä om Skandinaavia maie seldsi Sleipnir liigõ. 1993. aastagal tekk tä nuuri soomõ-ugri rahvidõ konvõrendsil Ižkarin (Udmurdimaa) ettekandõ võro keele kotsilõ.

Nele Hollo om avitanu tetä Mino Võromaa võistlusõ 9. kogomikku ja Julius Ungru raamatut “Paganamaa mehe mälestusi” (Võro Instituut 1996). Viil om tä tõlknu norra keele trysili murdõst võro kiilde Einar Skjæraaseni ja Tor Jonssoni luulõt.

Nele Hollo kirätöid om ilmunu:

Mino Võromaa kogomiku nr 2 – 9
Viruskundra, 02.1995
Viruskundra, 06.1955
Meie Meel
Lauluisa radadel. Võru 1. Keskkooli almanahh. 1996