Joba kolmõl kõrral olõmi saanu kokko umakeelitsel laulu- ja rahvapidol. Edimäne pido and’ huugu järgmäidsile ja kinnüt’, et uman keelen om hää laulda’. Tõnõ tekk’ kimmämbäs umakeelist ilma ja nõst’ avvu sisse Vana Võromaa kihlkundlikku vaimu. Kolmas pido kõnõl’ pühäst Võhandu jõõst, kuun üteldi pallõmisi mi rahva ja maa iist ja laulti rahvalaulõ.

Neläs Uma Pido tulõ 28. mail 2016 Põlvan Indsikurmun ja lätt sügävähe võrokõsõ süämehe ja kõnõlõs mõtsast, väeliidsist puiõst ja inemiisi köüdüssist näidega. Egä puu om ku ilmasammas, miä kand taivast ja and tuuga meile, inemiisile, ruumi ellä’.

Ma’ unista tuust, et neläs Uma Pido panõssi meid inämb hoitma – ummi inemiisi, umma kiilt, umma koto, umma mõtsa. Ütstõsõ hoitminõ hoit ka ilmasammast kimmäna, taivast korgõl ja maailma suurõna…

Mi rahva miil ja kiil omma’ köüdetü mõtsaga. Pidol nakkami laulma mõtsakeelen. Teemi tuud kõgõst süämest, mõtsikult; teemi tuud nii, et üten laulva’ ka Indsikurmu puu’!

Kristo Toots
IV Uma Pido lava pääle säädjä

 

Teedüs:
www.umapido.ee
http://umapido.wordpress.com
https://www.facebook.com/UmaPido-278039651663/
P.S. Teedä om joba ka V Uma Pido aig – tuu tulõ 2. juunil 2018 Võrol.

 

Jagamine