Täämbädsel imäkeelepääväl, 14. urbõkuul andsõ Võro Instituut üten Võromaa ja Põlvamaa arõnduskeskusõga Põlva Koolin kätte timahavadsõ võrokõisi Hindätiidmise avvohinna.

Avvohinnaga kitetäs alatõn 2012. aastagast Vana-Võromaa latsiaidu, kuulõ ja asotuisi-ettevõttit, kiä omma uma põlidsõ keele ja meele hoitmissõ silmänakkavalt rõhku pandnu. 2025. aastaga preemiäsaaja omma Põlva Kuul, Võro valla latsiaia Lõunapärlid Väimälä maja, Pulga Jaan, Kääpä Kuul ja Lasva latsiaid Pargihaldjas.

Avvohinna saajas pakuti vällä säidse kandidaati. Näide pannust võrokõsõs olõmise avvo seen hoitmissõ kaalsõ hindäjide kogo kuunsaisun Ivari Padar ja Evely Haug (Võro Instituut), Kristi Vals (Võromaa Arõnduskeskus), Merike Tigas (ansambli Käokirjas) ja Eve Neemsalu (Põlvamaa Arõnduskeskus).

Hindätiidmise avvohinna anti vällä säidsmendät kõrda. Avvohinnas om Vana-Võromaa kirjuga tenokiri, mille om kujondanu Epp Margna, ja keraamilinõ meelüs – keeletsirk, mille om tennü kunstnik Anu Roosma. Kolmõ edimädse avvohinnasaaja jaos and Eesti Rahvakultuuri Keskus ka tsihiga preemiäraha.

Varatsõmba Hindätiidmise avvohinna saaja:

2012. aastagal – Orava Põhikuul, Sõmmõrpalo latsiaia keelepesärühm, Haanimiihhi Nõvvokoda.
2013. aastagal – Haani Kuul, Põlva latsiaia Mesimumm Meelespea rühm, Krabi Külätiatri.
2014. aastagal – Mamastõ Latsiaia ja Kooli keelepesarühm, Mamastõ Latsiaia ja Kooli võro keele ja kultuuri oppaja Marju Lepasson, Orava Kuul, Võromaa Spordiliit.
2015. aastal – Rõugu latsiaia keelepesärühmä, Põlva latsiaia Pihlapuu keelepesärühm, Mõnistõ Kuul, Puiga Põhikuul, Mõtsavelle talo ja ansambli Laheda Mutid.
2016. aastagal – Hargla Latsiaid-Põhikuul, Kuldri latsiaid Sipsik, Talina Võro Selts, MTÜ Folgisellide Selts ja Puiga võrokiilse näütemängopäävä kõrraldaja Helve Ruul.
2017. aastagal – Võro latsiaid Sõleke, Põlva Jakobi Kuul, Põlva folklooriansambli Käokirjas ja Jana Orion Talina Kadrioro raamadukogost.

Jagamine