• Estonian
  • English
  • Võro

Eesti ammõtlistõ turismiteedüse võrku puhkaeestis.ee tull jaanuari lõpun Lõunõ-Eesti regiooni tsihtkotustõ hulka mano Vana-Võromaa piirkund. Vana-Võromaa om kimmäs kultuuripiirkund, miä haard võrokiilsit kihlkundõ Põlva, Võro ja Valga maakunnan ja om innekõkkõ tunnõt teno võro keelele ni savvusannakombilõ.

Eesti tuuritamismaastigu teedüsvõrgun tuvvas miiliköütvit paiku vai tsihtkotussit vällä regiuunõ viisi. Lõunõ-Eesti regioonist om põnõvis piirkunnõs varrõmb vällä pakut Tartot, Villändit, Otõmpääd, Setomaad, Suumaad ja Peipsimaad, minkalõ 2020. aastaga jaanuarin tull´ tsihtkotusõs mano ka Vana-Võromaa.

Vana-Võromaa piirkunda oppasõ tundma 42 kaemiskotust ja kats matka lehel puhkaeestis.ee, keväjäga tulõ täivvendävit pakmiisi kultuurimatkõlõ viil mano. Vana-Võromaa üte umamooduga – savvusanno ja sannakombidõga – või egä tahtja kõrraga tutvas saia ja hindäle meeleperi sanna vällä valli. Aasta läbi omma valla Vana-Võromaa muusõumi, ütte ku tõist võit läbi ellä Postitii pääl.

Vana-Võromaa turismipiirkunna ettenäütämist nakati valmistama 2016. aastal, Põlva ja Võro maakunna turismikõrraldajide, Võro Instituudi ni EAS turismiarõnduskeskusõ kuuntüün.

„Kultuuriperändüse köütmine ettevõttidõga lask mi esimuudu olõmisel väega häste vällä paistuda. No saami üle-Eesti turismivõrgun küläliisile uhkusõga näüdädä, et Võro maakunnan omma kats uma näoga tsihtkotust, pääle Setomaa ka Vana-Võromaa, tervet Lõunõ-Eesti piirkunda om kavvõmbast küläliisile kergemb tutvas tetä läbi esinäoliidsi kultuuripiirkundõ“, seletäs tsihte SA Võrumaa Arenduskeskus juhataja Tiit Toots.

Võro Instituudi direktri Rainer Kuuba näütäs asjo viil mõnõ tähtsä nuka alt: „Vana-Võromaa, võro keele ja võrokõisi eräle välläkitmine nõst kimmähe kõiki võrokõisi hindätiidmist ja uhkust. Ja üts tähtsä asi om viil – seo avitas Põhja-Eesti inemiisil edespiten vast parõmbahe vaiht tetä võrokõisil ja setodel. Olõmi tan naabri, a ütesugutsõ mi olõ-i joht“

Vana-Võromaa piirkunna tutvastegemises om varrampa kokko pant ja trükit „Vana-Võromaa tiijuht. Vana-Võromaa turismikaart“, midä om pääle võro-eesti-kiilse olõman ka inglüse, läti, soomõ ja vinne keelin. Turismimessi Tourest 2020 aos sai valmis trükütükk ka Vana-Võromaa hindätiidmist tugõvidõ ettevõtmiisi kotsilõ.

Vana-Võromaa turundustegemise omma mitmit aastit rahha saanu Vana-Võromaa arõndusprojektõ toetuisist (Maaeloministeerium), Võromaa Partnerluskogo käest ja Rahvakultuuri Keskuse Vana-Võromaa perändüskultuuri tugõmisõ meetmest.

Teedüsse man om pilt, miä om tettü puhkaeestis.ee lehe päält ja näütäs Vana-Võromaa tsihtkotusõ avalehte.

 

Teedüst saa mano:

Kadri Moppel
SA Võrumaa Arenduskeskus
turismikoordinaatri

Telefon +372 5331 1919
kadri.moppel@vorumaa.ee

 

Külli Eichenbaum

Võro Instituut

projektijuht

Telefon +372 5661 1924

kylli.eichenbaum@wi.ee