Võro Instituut tugõ Vana-Võromaa kuulõ miiskundõ võro keele ja kultuuri kooliello poimmisõ man, et mi kandi oppajidõ ja nuuri hindätiidmine kasunu. Tsiht om poimidu ainõ- ja keeleoppusõ poolõ, et umal keelel ja kultuuril olnu koolõn kimmäs kasumisõpind ni naa käünü loomuligult egäpäävädse koolielo mano.

Ku sul um mõtõ vai küsümüs, midä tahat jaka, kiroda vai kõlla koolioppusõ nõvvoandjalõ.

Alostus

1987. aastagal alost Võromaa hariduskuundis iinotsan Leoski Arviga koolilatsi võrokiilside kirätöie võistlust „Mino Võromaa“.
1988. aastagal, vahtsõl heränemisaol, luudi võro keele ja kultuuri tugõmisõs Võro Keele ja Kultuuri Fond (VKKF), kõrraldõdi kuuholõkit, seltskundliidsi ettevõtmiisi ja ilmutõdi aokirändüsen kirätükke paiklidsõ keele ja kultuuri kotsilõ.
1989. aastagal tetti oppaja Karendi Aino ja võrokiilse aabidsa kokkopandja Jüvä Sullõvi iistvidämisel Võro I Põhikoolin edimädse võro keele tsõõritunni, kon kullõldi muinasjuttõ, laulõti ja tsehkendädi. Tuulsamal aol naati võro keele vabaainõtundõga pääle ka Antsla Keskkoolin: oppaja Silmä Anu ja VKKFi tuuaignõ edemiis Pulga Jaan opassi võro kiilt kõrra nädälin 10. klassilõ.
1990. aastagal tetti valla Võro Instituut, minka ütes tsihis sai võro keele ja kultuuri oppamisõ tugõminõ. Kõrraldadi koolituisi võro keele oppajilõ ja naati vällä andma võrokiilset opimatõrjaali. Võro keele oppusõ Vana-Võromaa koolõn võisõ jaka kolmõs: aabidsaoppus, kodolugu ni võro kiil ja kirändüs. Inämbüsen koolõn olli neo kolm tsihti poimidu. Mõnõn koolin panti võro keelele rõhku ka perimüsmuusiga- ja näütemängotsõõrin.

Parhillanõ sais

2010. aastil alostadi mitmõn koolin mõnõ opiainõ oppamist võro keelen (nt tüüoppus Haani ja Mõnistõ koolin, võro kirändüs Vahtsõliina Gümnaasiumin). Eräle umakultuuri vai võro keele tunnõ mant naati liikma poimidu ainõ- ja keeleoppusõ poolõ. Tuud muutust oll vaia, selle et inneskine kõrd oll uma ao är elänü ni kõrrast rassõmb oll löüdä herksit võro keele oppajit.
2011. aastagast alatõn om võetu tsihis luvva umakultuurilõ koolõn ja latsiaidun laemb kasumisõruum ni tetä tuu võimaligult hulga oppajidõ ni nuuri egäpäävädse elo osas.
2012. aastagal nakas Võro Instituudi ossavõtmisõl pääle Interreg VI-A Eesti-Läti programmi (2021–2027) ütisprojekt „Umakultuur mi ümbre“. Projekti toega om kotussõpääline kiil ja kultuur latsiaidun ja koolõn inämb nätä, nii latsi, nuuri ku ka täüskasunuidõ tiidlikkus võro keelest om kasunu. Vana-Võromaa haridusasutuisin, kiä ettevõtmisõn üten teivä, om luudu hää pind edesises võro keele opmisõs ni näide miiskunna andva iinkujjo tõisilõ piirkunna latsiaidulõ ni koolõlõ. Projekti kotsilõ saa lähkümbält lukõ siist: https://www.umakultuur.ee/p/tutvustus.

2025/26. opiaastagal tetti võro keele tunnõ Rõugõ Põhikooli Haani koolimajan (2.–5. klass), Põlva Jakobi Koolin (2., 4.–5. klass), Lüllemäe Koolin (3. klass). Poimit keeleoppust (mõnõn ainõtunnin vai huvitsõõrin kõnõldas kimmält võro kiilt) tetti Rõugõ Põhikooli Mõnistõ ja Varstu koolimajan, Kääpä Koolin, Võro Keskliina Koolin, Harglõ Koolin, Vahtsõliina Gümnaasiumin, Võro Kreutzwaldi Koolin.

 

 

 

Jagamine