Õdagumeresoomõ piiriq
Võro Instituudi süküskonvõrents Võrol
Kotus: kood/Võru saal Võro liina Tsõõriplatsi veeren (Tartu tn 25, II kõrra pääl)
22.–23. rehekuu 2026

Kutse konverentsile

Võro Instituudi süküskonvõrentse alostusõst saa timahavva 30 aastakka. Neoq kõnvõrendsiq ommaq olnu villäkandvaq ja inspiriirväq: eri maiõ ja põlvkundõ keeletiidläisi, folkloristõ ja arkeoluugõ arotuisin om sündünü vahtsit ideid, miä ommaq mõotanu kõiki tiidüsharrõ arõnõmist.

Neil konvõrentsel om kõnõld õdagumeresoomõ keele- ja kultuuriala piirest, keelekontaktõst, inemise- ja kotussõnimmist. Tan om arotõt õdagumeresoomõ keeleala lõuna- ja hummogupiiri üle, a põnõviid edenemiisi toimus ka põh’a ja õdagu puul. Parhillatsõni olõ-i selge, mitu õdagumeresoomõ kiilt om ülepää olõman. Kiä otsustas, et kiil om olõman ja minkas tuud mõõdõtas? Näide ja muidõgi teemadõ üle arotamiq vahtsõst uma timahavvadsõl konvõrendsil.

Konvõrendsilõ ommaq oodõdu ettekandõq, miä kaesõ vahtsõst üle õdagumeresoomõ keele- ja kultuuripiire küündümiseq, analüüsvä kiili kujonõmist ja levinemist ja tõisi teemasid, miä seoga kokko lääväq. Oodõdu ommaq ettekandõq, miä kaesõq, midä huvitavat om toimunu vai toimuman õdagumeresoomõ ala kokkoputmisõl tõisi kiili ja kultuurõga. Huvvi pakk kotussõnimmin alalõ püsünü õdagumeresoomõ substraat.

Konvõrents om interdistsiplinaarnõ – oodõdu ommaq keeletiidläisi, arkeoluugõ, geenitiidläisi, ao- ja kultuuriluulaisi, folkloristõ ja tõisi tiidläisi vahtsõmbaq kaemisõq õdagumeresoomõ kiili ja kultuurõ piirele, piirimaal nätäq olõvidõ asju pääle. Väega oodõdu ommaq ettekandõq, kon andas mõtõt Lõuna-Eesti ja lõunaeesti keele rollilõ õdagumeresoomõ piiri pääl.

 

Kirjapandminõ ja muu kõrraldusõ teedüs

Konvõrendsi tüükeeleq ommaq kõik õdagumeresoomõ keeleq ja inglüse kiil. Ettekandit ei tõlgitaq.

Ku sooviti üles astu ettekandõga (20 min kõnõlõmisõs ja 10 min arotusõs), tulõ hinnäst kirja pandõn manoq panda ettekandõ päälkiri ja teesiq (kuni 300 sõnna). Päälkiri ja teesiq piät olõma är saadõt ildampa 10. süküskuus 2026. Kõikil ossavõtjil, ka noil, kiä taha-i ettekannõt pitäq, tulõ hinnäst konvõrendsile kirja panda ildampa 12. rehekuus 2026 siin.

Konvõrendsi kava säetäs kokko nii, et osavõtjaq jõvvassi Tal’nast Võrolõ edimädse bussiga ja jõvvassi tõsõl pääväl viimädse Tal’na poolõ minejä bussi pääle.

Osavõtumassu olõ-i. Süümine ja üümaja Võrol om egä osavõtja hindä kõrraldaq. Kirjapandnuilõ saadõtas täpsämb teedüs süümise ja üümaja võimaluisi kottalõ. Kohvi- ja tsäipausiq ommaq kõrraldajidõ puult. 22. rehekuu õdagu om plaanin pidolik vastavõtt Võromaa muusõumin, miä om ettekandõ pidäjilõ massulda, tõisilõ mass 25 eurot (kas võtat ossa, tulõ är märki registriirmisel siin).

Järgmäne konvõrendsi ringkiri kuun ettekandidõ kavaga saadõtas kirjapandnuilõ osavõtjilõ süküskuu lõpun.

Kõiki küsümiisiga pallõmi kirotaq vai kõlistaq:

Võro Instituut, Tartu tn 48, 65609 Võru
e-post: wi@wi.ee
tel (+372 )782 8750 (Tuuli Abel, sekretär)
tel (+372) 5621 3174 (Evar Saar, onomastika tiidrü)

 

 

Jagamine