7. lehekuu pääväl oll Sänna Kultuurimõisan 22. võrokeeline Artur Adsonilõ pühendet luulõpäiv, kon asti üles 19 last Kääpält, Haanist, Võrolt, Põlvalt ja Tartolt. Noorõ luulõlugõja, 39. “Mino Võromaa” konkursi avvuhinna saanu kirotaja ni näide oppaja panni Sännä mõisa saali võro keelega keväjädselt helämä.

Luulõpääväst võti ossa üts latsiaid ja viis kuuli, kõgõ inämb esisugumaidsi etteastiid oll Võro Kreutzwaldi Koolist. Mitu palla loeti Contralt ja Saarõ Evarilt, sündmüse nimiautori luulõtust kanti ette ütel kõrral. Kokko kõlasi 6.-18.-aastagaidsilt luulõlugõjilt kümme etteastmist, naist kolm loeti ette rühmäga.

Etteastmiisi hinnassi luulõpääväst ossavõtja esi – kõik saiva egän vannusõrühmän är märki kõgõ inämb miildünü lugõja. Päält helle kokkolugõmist sai tunnustusõ järgmädse esisaisva lugõja:

• latsiaia ja I klassi vannusõrühmän Kääpä Kooli 1. kl lats Heti Rauk, kiä esit Luiisa Marleen Lepä luulõtusõ “Läämi mõtsa!” (op. Kadri Kivit);
• II-IV kl vannusõrühmän Võru Kreutzwaldi Kooli 3. klassi lats Reimo Piller, kiä lugõsi Artur Adsoni luulõtust “Vahetunn” (op. Pilvi Saarma);
• V-VII klassi vannusõrühmän Rõugu Põhikooli Haani opikotussõ nuur Ebe Vodi, kiä esit Mariko Fasteri luulõtusõ “Hahatriibulinõ kass” (op. Kersti Leit);
• IX-XII klassi vannusõrühmän Tartu Waldorfgümnaasiumi 9. kl nuur Tuulõ Iva, kiä esit Jaan Kaplinski luulõtusõ “Suvi satas ladinaga taivast alla” (op. Epp Ollino).

Publigu hinnnangu näütsi, et võro kiil kõlas kõgõ kimmämbält ütenkuun, ku olg-ola tunnõ luulõlugõmisõlõ huugu ja vunki mano and. Kõik rühmän ette kantu luulõtusõ saiva kullõjilt ärmärkmise ja tunnustusõ:

• Võro Latsiaia Tähesära Sõlõkese maja Päävätsirgu rühmä latsõ Adeele Paltsepp, Armin Tiks, Romeli Rüütli ja Mia Sofia Adel loi ummi oppajidõ Maia Päevalille ja Lea Sika luudu luulõkava “Kos jäi mu laul?”;
• Võru Kreutzwaldi Kooli 2. kl latsõ Romet Ilves, Romet Vessin, Martha Venne ja Steven Ermel loi luulõpõimigu “Läämi kaemi!” Milvi Pangalt ja Aveli Ladvalt (op. Eve Jurask);
• Põlva Gümnaasiumi 11. kl noorõ Mairo Paabut, Martti Pavlov ja Kerdo Roodes loi Evar Saarõ luulõtusõ “Sannalugu 2” (op. Merili Ermel).

Võrokeelist Artur Adsonilõ pühendedüt latsi ja nuuri luulõpäivä peeti timahavva joba 22. kõrda. Sännä ku katõ suurõ võro kiränigu – Artur Adsoni (1889-1977) ja Juhan Jaigi (1899-1948) – sünnü- ja latsõpõlvõkotus om saanu uma kandi kiilt tähtsäs pidäjide oppajidõ ja latsi kokkosaamisõ paigas. Edimäst kõrda tulti võrokeelist luulõt lugõma 30. vahtsõaastagakuul 1999. aastagal Sännä inneskiste koolimajja, kon Artur Adson latsõn elli ni koolin käve. Tuust aost pääle kõrraldõdas Sännän keväjä vaheldumiisi võrokeelist Artur Adsoni luulõpäivä ja Juhan Jaigi jutupäivä.

Luulõpäivä kõrraldi ja tugõsi Võro Instituut, MTÜ Sänna kultuurimõis, Eesti Kultuurkapital.

Võro Instituut tennäs kõiki oppajiid ja latsõvanõmbiid, kiä luulõpäävä kõrdaminegile üten avidi.

Rõõmusossa Triin
kooliharidusõ projekte iistvidäjä
Võro Instituut
53487937

 

Pääväpildi: https://photos.app.goo.gl/WWqFnYzGnyhLiEow5

Ülesvõttõ tekk Toomõ Triin

 

 

 

Jagamine