18. juunil kl 18 om Võrol Kandlõ aian kontsõrt “Rõõmsa lats”. Kontsõrdil laulva Laulupesa latsõ vahtsit võrokeelitsit latsilaulõ, miä omma luudu keelepesä- ja muusigaoppajidõ ütistüün paar aastat tagasi.

“Võrokeelitsit täämbädse ao sündmüisist kõnõlõvit latsilaulõ ei olõ hulga kaupa võtta. Laulu omma sündünü tarvidusõst võro keele rühmin umakiilsit laulõ laulda,” selet Võro Instituudi keelepesä projektijuht Evely Haug. Päält Laulupesa latsi om kontsõrdikavva poimit ka Võro liina keelepesärühmä latsi ülesastminõ.

Laulõ luumisõ man olli abis muusik ja lauluoppaja Triin Norman, luulõtaja Jan Rahman ja Võro Instituudi spetsiälisti Mariko Faster ja Evely Haug. Laulu pand noodikirja koorijuht ja muusigaoppaja Silja Otsar.

Vahtsit laulõ saa piä kullõlda Youtube’ist, ka fono ja noodi saa kätte Võro Instituudi kodolehe päält.

Projekt om jakk 2023. aastalõ, ku sammamuudu sai valmis 16 vahtsõt võrokeelist latsilaulu. Projektiga suurõndõdas võrokiilside laulõ populaarsust ja laendõdas võro keele tarvitusvaldkundõ.

Teedüs:

Evely Haug

Võro Instituudi keelepesä projektijuht

evely.haug@wi.ee

tel: 782 8754

Jagamine