Sannu peremiihi abiga om 2025. aastaga talvitsõs käänüpääväs kirja saanu 770 suidsusanna. Noist 720 kotsilõ omma ka sannakombõ kirja pant. Suidsusannu kokkolugõminõ naas pääle 2025. aastaga keväjädsel käänüpääväl ja lätt edesi, selle et om viil hulga sannu, miä olõ-i üle loetu.

Kokkolugõminõ jakkus: jõuluaol iho ja heng suidsusannan puhtas ja sann kirja!

Kiä olõ-i viil aigu saanu uma suidsusannast teedä anda, sõs pikä ni raholidsõ pühä om õkva õigõ aig uma sanna pääle mõtõlda ja kas esi vai tutvidõ abiga veebin küsümiseleht är täütä. Link ja juhatusõ omma veebilehe savvusann.ee pääl.

Talvitsõst käänüpääväst edesi tulõva talvõpühä, aastagatsõõrin kõgõ pikembä pühä, mille kombidõ hulgan om kimmäs kotus suidsusannal. Kokkolugõmisõ käügin korjunu tiidmise päält saa üteldä, et suurõmbal jaol sannaperrist om iks kombõs pühhi aigu sanna kütta ja sannan kävvü. Piä poolõ suidsusannust saava jõulupühhi aigu köetüs, a om ka perrit, kon vana-aastaga viimätsel pääväl vasta vahtsõt aastagat haritas puhtas nii iho ku heng.

Talvõpühhi aigu sanna kirjapandjil om võimalus avvohind saia

Eräle loosiratas käü ümbre noilõ, kiä pandva uma sanna kirja talvõpühhi aigu – käänüpäävast kooni kolmõkuningani. Kõiki kokkolugõmisõst ossavõtjidõ vaihõl loosimi vällä kolm savvusanna-lavvamängu ja kolm suidsulihapildiga sainakallõndrit. Kinkal loosiga vidä, saa selges õkva pääle pühhi lõppu 7. jaanuaril. Teedüst saa tuu kotsilõ sannalehe savvusann.ee päält uudissidõ alt.

Vana-Võromaa suidsusannakombõ omma UNESCO vaimlidsõ kultuuriperändüse esindüsnimistün aastagast 2014. Kokkolugõmisõ käügin uurimi, ku pallo ja määndse mi sanna omma, määndsist kombist peetäs luku. Aituma häädele sannaumanikõlõ, kiä omma joba üles märknü nii uma sanna ku ka perre sannakombõ!

Ettevõtmist omma tugõnu Eesti Rahvakultuuri Keskus ja Eesti Kultuurkapitali Võromaa ekspertgrupp.

Täpsämbät teedüst saa:

 

Eichenbaumi Külli

Vana-Võromaa suidsusannu kuuntüükogost

kylli.eichenbaum@gmail.com

tel 5661 1924

 

Puksingu Marko

sannu kokkolugõmisõ iistvõtja

marko.puksing@ut.ee

tel 511 7446

 

Teedüse man om pilt Ööbiksaare sannast, kon sannu kokkolugõmisõ mõtõ aastagal 2019 sündü. Foto: Marko Puksing

 

Jagamine