Suund naas pääle Vana-Võromaa kotussõnimmi suurkogumisõga 1995–2003. Evar Saar tekk´ kotussõnimevälitüüd Eesti põhikaardi 1:20 000 jaos ja löüdse egäst küläst ja kandist üles parõmba kotussõnimetiidjä, kinka käest küsse, kuis kutsutas külli ja tallõ, mäki, soid, hainamaid, mõtsu ja muid kotussit, mis kaardi pääl häste nätä olli. Perioodi tõsõl poolõl naaś tä koguma ka nurmõnimmi ja muidõ, kaardi pääle mitte kantavidõ kotussidõ nimmi, nigu näütüses tiinime. Kogumisõl oll´tähtsä nimekõrralduslik külg, tuu kottalõ loe alapäätüküst Nimekõrraldus. Aastidõ joosul kõnõldi kotussõnimmist umbõs 7000 inemisega kõgõl Vanal Võromaal (4200 km²), Setomaa Eesti osan ja Lõuna-Tartumaa veere pääl, hummugu puul Valga-Arula juunt.

Vanalt Võromaalt kogutuist kotussõnimmist panti kokku kaardiga köüdet andmõbaas 23 674 nimme kandva kotussõga. Seod saa kaia Maa- ja Ruumiammõdi kaardirakenduisin, kaardikihi nimi om Võrumaa kohanimed. 2008 kaitsõ Evar Saar seo matõrjali päält doktoritüü Vana-Võromaa kotussõnimmi tüpoloogia ja nimesüsteeme kottalõ.

Säält edesi om tegeld päämidselt aoluulidsõ nimeuurmisega. Evar Saar ja Mariko Faster uursõva läbi Vana-Võromaa, lisas Sangaste, Otepää ja Rõngu kihlkundõ külänime. Tulõmus om välläandõn Eesti kohanimeraamat, miä ilmu 2016. Om tegeld vähämbide piirkundõ talonimmi aoluu uurmisega, tuul alal olõmi Lõuna-Eestin valmi kuuntüüs ja uurmistüü juhendamisõs.

Mariko Faster om uurńu liigisõnnu Võromaa ja Setomaa kotussõnimmin ja kaitsnu doktoritüü Harglõ kihlkunna viikokõ nimmist (2020).

Lisas vannu nimmiga tegelemisele olõmi uurnu suurpõllumiihi nurmõnimmi, jahimiihhi kotussõnimmi mõtsan ja nimemuudu katastriütsüisi nimetämise man.

Jagamine