Minevä nädäli lõpun peeti Suitimaal Lätin projekti “Umakultuur mi ümbre” töine kokkosaaminõ ja tuu seen oll´ ka oppajilõ mõtõld foorum. Kokkosaamisõ iinmärk oll´ jaka projekti käügin kogotuid kogõmuisi tõisiga ni tetä plaanõ tulõvigus.

Foorumilõ kogosi kokko küländ hää hulk oppajit Kuldīga kandi kuulõst. Päält näide ka rahvast Eestist: Meel Valk Võromaa Arõnduskeskusõst, Nele Hendrikson Võro Instituudist, Triinu-Liis Tarros Seto Instituudist, Ere Tumm Võro Kreutzwaldi koolist ja projekti koordinaatri Silja Lehtpuu. Kotussõ pääl võti meid vasta Kuldīga kooli ja valla inemise. Üritüsele oll´ tulnu ka Ziemeri põhikooli rahvas.

Alsunga om Suitimaa väiku pääliinakõnõ, umbõs 1000 inemisega külä, miä om aoluulidsõ suiti kultuuri keskus ja süä. Nigu mi kandin võrokõsõ ja seto, pruuvva nimäki avvu seen hoita paiklikku ummamuudu kultuuriperändüst ja kiilt.

Ütitsest projektist ossavõtminõ om avitanu kõigil osaliidsil selges saia, määne sais umakultuuriga haridusõn om, om vällä tüütet opimatõrjaalõ ja pant noid üles veebilehe pääle. Kae umakultuur.ee!

Projekti lõplikkõ kokkovõttit tetäs viil seo aastaga seen.

Kokkosaaminõ peeti Interreg Eesti-Läti programmi projekti „Surrounded by Heritage“ ehk „Umakultuur mi ümbre“ raamõn. Tuusjaos om rahha andnu Interreg VI-A Eesti-Läti programm 2021–2027.

         

         

         

Jagamine